Min hu Dr. Edward Cassar Delia?

Kandidat f’isem il-Partit Laburista għall-elezzjoni ġenerali li jmiss fuq it-tieni u t-tielet distrett.

Bin Joseph Cassar Delia, tabib tal-familja, u Dorothy (née Serracino), huwa trabba f’Ħaż-Żabbar u f’Wied il-Għajn ma’ ħutu. Ħa l-edukazzjoni tiegħu fil-Kulleġġ ta’ De La Salle f’Bormla, u l-“Junior Lyceum” tal-Verdala, ukoll f’Bormla.

Plejer tal-futbol u l-“basketball” f’żgħożitu, ipprattika wkoll il-“bodybuilding”, fejn ikkompeta darba fil-kampjonati nazzjonali fil-bidu tad-disgħinijiet.

Cassar Delia studja fl-Università ta’ Malta, fejn iltaqa’ mal-mara futura tiegħu, Dorothy.

Wara li gradwa mill-Università ta’ Malta, rebaħ diversi boroż ta’ studji differenti barra minn xtutna li kienu ta’ għajnuna kbira għalih u li għenuh jibda jispeċjalizza fl-Ortopedija Trawmatoloġija u l-Mediċina Fiżika.

Filwaqt li kien qiegħed jgħix u jistudja f’Ruma, huwa ħadem id f’id ma’ diversi tobba li jispeċjalizzaw fl-“Athletic Performance Enhancement u Orthopaedic Rehabilitation”, b’uħud minnhom li kienu membri tal-CONI, il-Kumitat Olimpiku Nazzjonali Taljan.

Fl-1994, huwa żżewweġ lil Dorothy (née Busuttil). Huma għandhom żewġt itfal, Andrea u Ana, u jgħixu ħaż-Żabbar.

Messaġġ ta’ ispirazzjoni:

“Ask not what your country can do for you, but what you can do for your country.” – John F. Kennedy, ex-President tal-Istati Uniti.

Għaliex iddeċidejt li tikkontesta mal-Partit Laburista?  

Naħseb li kien hemm żewġ raġunijiet prinċipali. Sa minn meta kont tfajjel kont nesperjenza mill-qrib il-karriera ta’ missieri fil-politika. Stajt nara ta’ kuljum, numru konsiderevoli ta’ nies jirrikorru għall-għajnuna ta’ missieri għall-problemi li kienu qed jiffaċċjaw. Sa minn kmieni għalhekk skoprejt is-sodisfazzjon li wieħed iħoss wara li jkun serva biex għen lill-proxxmu fil-bżonn. Wara kollox dan hu t-tagħlim ta’ Sidna Ġesù Kristu fil-prattika.

It-tieni raġuni hi li meta kont iżgħar stajt nara b’għajnejja u mmiss b’idejja l-ġid vast li kien għamel il-Gvern Laburista tal-1971. Daħħal iċ–Children’s Allowance, ħoloq il-pensjoni taż-żewġ terzi, waqqaf il-“minimum wage”, ġab l-ekwilibriju fil-pagi tal-irġiel u n-nisa, flimkien ma’ ruxxmata ta’ benefiċċji għall-familji Maltin u Għawdxin. Minn stat ta’ tbatija biex jgħixu diċenti, l-anzjani tagħna kienu sabu ruħhom sinjuri żgħar.

Il-Gvern Laburista tal-1971 irnexxielu jattira fabbriki u xogħol importanti mill-Ġermanja li għadu jrodd il-ġid lill-ekonomija sal-lum. Ħoloq l-Air Malta. Ġab fuq saqajh lit-turiżmu. Radd lil Malta l-ħelsien komplut u assolut. Dan iż-żmien meraviljuż ta’ tant kisbiet ma setax ma jimpressjonax il-fantażija ta’ ġuvnott bħali.

Xi tħoss li huma l-akbar kisbiet li għamel il-Gvern Laburista fl-aħħar snin?

Fl-opinjoni tiegħi, iċ-Childcare mingħajr ħlas kien mod inġenjuż biex f’qasir żmien l-ekonomija tal-pajjiż issaħħet b’mod straordinarju bid-dħul fil-kamp tax-xogħol ta’ mijiet ta’ nisa.  Illum qed naraw pajjiżi akbar minn Malta jaraw kif jikkupjaw din l-istrateġija.  Il-Gvern Laburista bil-ħolqien ta’ tant impjiegi tajbin irnexxielu jgħolli f’qasir żmien il-livell tal-għajxien tal-poplu Malti u Għawdxi.  Ma nistax ukoll inħalli barra l-passi kbar ‘l quddiem li wettaq il-Gvern Laburista fil-kamp tad-diżabilità.  Irnexxielu wkoll jeqred ħafna mill-burokrazija li kienet qed toħnoq il-kummerċ.

Kif iġġedded il-Partit Laburista tul is-snin?

Nieħu pjaċir ninnota il-kontinwazzjoni u l-konsistenza f’kull fergħa tal-Partit Laburista (żgħażagħ, nisa, anzjani). Ma jaqtgħux is-seminars, il-korsijiet u n-numru kbir ta’ laqgħat li jservu ta’ egħjun friski ta’ proposti u idejat biex il-pajjiż jibqa’ miexi fit-triq tal-progress.  Jekk inħarsu lejn l-avversarji politiċi tagħna, li jiftaħru bis-snin twal u storiċi mit-twaqqif tal-Partit tagħhom, naraw illi l-aħħar żewġ mexxejja ‘instabu’ minn barra l-istrutturi tal-Partit Nazzjonalista. Wieħed jista’ jgħid illi l-aħħar żewġ mexxejja ġew mit-triq u mhux mill-istrutturi tal-Partit!

X’impressjoni ħadt bid-deċiżjonijiet li ħa Robert Abela fl-aħħar xhur?  

Kull min hu ta’ rieda tajba seta’ jagħraf f’Robert Abela il-baħri qalbieni tal-maltemp. Rajna u għadna naraw, kif pajjiżi b’riżorsi ferm akbar minna, ittrattaw il-problemi li mponiet fuq id-dinja l-pandemija.

Fl-aħħar xhur il-Gvern ta’ Robert Abela ħadem bi pjan u l-poplu sab Gvern attiv u preżenti miegħu.

Hu stqarr, “Aħna ħadna f’dawn l-aħħar xhur forsi l-aktar deċiżjonijiet f’mument iebes u l-aktar deċiżjonijiet iebsin li qatt se jkollna ħtieġa li nieħdu. Iżda għax kellna l-kuraġġ li neħduhom f’mumenti diffiċli llum il-kuraġġ fit-teħid ta’ dawk id-deċiżjonijiet qed jissarraf f’fiduċja u f’ottimiżmu b’konsegwenza tal-pjan li ħdimna bih.”

Fil-fatt ir-rapport tal-Kummissjoni Ewropea, bassar kif l-ekonomija Maltija se tkun qed tikber iktar mill-medja Ewropea u darba u nofs aktar minn dak previst mill-esperti tal-Kummissjoni Ewropea.

Ma’ Robert Abela ħa mmorru ‘l quddiem flimkien mal-poplu b’bażi b’saħħitha biex infasslu l-futur ta’ pajjiżna.

X’inhi l-ħolma tiegħek għal Malta?

Malta aktar ħadranija. Aktar kannizzati bil-fjuri. Aktar b’dehra Mediterranja. Aktar sabiħa. “Parks” ħodor sbieħ jilqgħu l-familji għar-rikreazzjoni tagħhom. Il-Gvern preżenti qed jagħti importanza lill-ambjent, lill-ħdura, l-isbuħija. J’Alla jsib kull kooperazzjoni għax ambjent nadif u sabiħ joħloq atmosfera fejn iċ-ċittadin ikun jista’ jitpaxxa u jserraħ il-menti f’ħajja mgħaġġla li qisu aktar ma jgħaddi ż-żmien aktar qed toħloq stress fuq il-bnedmin.

Nixtieq li l-isport, il-kultura u l-arti tal-ispettaklu jiġu mogħtija l-importanza mistħoqqa lilhom u lil min jipprattikahom.